سەیرکردن و کاریگەری سایتە سێکسیەکان لەسەر تاکی کورد چییە ؟

 

ڕێژنە میدیا

بڕیاری داخستنی سایتە سێكسییەكان لەپەرلەمانی عیراق جوڵەی خستە نێو هەندێك لەپەرلەمانتاران و چالاكوانانی هەرێمی كوردستان بەمەبەستی جێبەجێكردنی ئەم بڕیارە، لەو چوارچێوەیەشدا لە شاری سلێمانی ۆركشۆپێك سازكرا، تێیدا پەرلەمانتارێكی ئەنجومەنی نوێنەرانی عیراق، ڕایگەیاند، ئەمە گەندەڵییەكی سەرەكییە‌و مەبەست لێی مەشغوڵكردنی گەنجەكانە، هاوكات مامۆستایەكی ئایینی لەوبارەیەوە وتی:” ئەم سایتە سیَكسییانە تیرۆری ئەخلاق دەكەن”، بەپێچەوەنەوە سەرۆكی سەنتەری ڕاوێژكاری خێزانی جەخت لەوەدەكاتەوە، داخستنی ئەم سایتانە دەبێتە هۆی زیادبوونی لادانی سێكسی، بەپێی ئامارێكی بەڕێوەبەرایەتی بەرەنگاربونەوەی توندوتیژی دژی ئافرەتان، ڕێژەی دەستدرێژی سێكسی بۆسەر ئافرەتان لە2012ەوە بەرەو كەمبونەوە دەڕوات.

سایتی سێكسی ڕۆشنبیری دابنرێت

ئاراز ناسیح، توێژەری كۆمەڵایەتی، ده‌ڵێت: ئەو سایتە سێكسیانە لادانە سێكسییەكان پیشاندەدات، بۆیە ئەمە زۆر خراپە‌و وا لەتاك دەكات توشی لادانی سێكسی ببێت، بۆیە دەبێت دابخرێن، بەڵام دەگونجێت هەندێك سایتی ڕۆشنبیری سێكسی هەبێت، كە لەڕوی زانستییەوە باس لەسێكس بكات یان سێكسكردن پیشانبدات، بەڵام بەجۆرێك بێت نەكەوێتە چوارچێوەی لادانە سێكسییەكانەوە.

لەكاتی داخستنی ئەم سایتە سیكسییانە گەنجان هەوڵی دۆزینەوەی ڕێگای دیكە دەدەن بۆ دامركاندنەوەی ئارەزووە سێكسییەكانیان، توێژەرەكە لەوبارەیەوە ئاماژەی بەوەكرد، سەیركردنی سایتە سێكسییەكان ڕێگا ناتەندروستەكەیە، لەبەرئەوەی بینینی ئەم گرتە سیكسییانە ئارەزوی سێكسی زیاد دەكات، ئەگەریش هیچ ڕێگەیەك بۆ دامركاندنەوەی ئەو ئارەزووە نەبێت، ناچار پەنا بۆ ڕێگەیەكی ناتەندروست‌و لادانی سێكسی دەبات.

حكومەت هاتە سەر خەت

هەر سەبارەت بەسایتە سێكسییەكان بەڕێوەبەرایەتی گشتی چاودێری‌و گەشەپێدانی كۆمەڵایەتی سلێمانی ۆركشۆپێكی لەژێر ناونیشانی “كاریگەری سایتە سێكسییەكان لەسەر لادانی سێكسی” ئەنجامدا، كە تێیدا ڕێكخراوەكانی منداڵان ‌و ژنان و گەنجان و چالاكوانان و یەكێتی زانایان بەشدارییان كرد.

 

لادانی سێکسی زیاد دەکات

سامان سیوەیلی بەرپرسی سەنتەری ڕاوێژكاری خێزان، بەپێچەوانەی ئەو توێژەرە كۆمەڵایەتییەوە، باسی لەوەكرد، لەحاڵەتی داخستنیان لادانی سێكسی زیادی دەبێت، چونكە ئەوكاتە تاك هەوڵ دەدات كەسانی دیكە بۆ خاڵیكردنەوەی ئارەزووە سێكسیەكانی بەكاربێنێت، بەڵام لەئیستادا تاك بەتەنها خۆی خاڵی دەكاتەوە.

ئاماژەی بەوەشدا، داخستنی سایتە سێكسییەكان بەرتەسككردنەوەی ئازادی تاكە كەسە و پێشێلكاری ڕاستەوخۆی ئازادی بەكارهێنانی ماڵپەڕە ئەلكترۆنییەكانە، بۆیە پێویستە لەجیاتی داخستنی ئەو ماڵپەڕانە تاكەكانی كۆمەڵگە هۆشیار بكرێنەوە، كە چۆن مەمەڵە لەگەڵ ماڵپەڕە سێكسییەكان بكەن.

 

سامان سیوەلی داوای لە پەرلەمانی كوردستانیش كرد، نەكەونە ژێر كاریگەری پەرلەمانی عیراقەوە و بڕیاری لەو شێوەیە نەدەن، چونكە داخستنی زیانی زیاترە وەك لەمانەوەیان.

 

ئامارەكانی دەستدریژی سێكسی چی دەڵێن؟

 

بەپێی ئامارێكی بەڕێوەبەرایەتی گشتی بەرەنگاربونەوەی توندوتیژی دژی ژنان،، لەماوەی 7 مانگی ساڵی ڕابردوودا 76 حاڵەتی توندوتیژی سێكسی دژ بەئافرەتان كراوە.

 

بەهۆی لادانە سێكسییەكانەوە چەندان كەس لەزیندانن
عەتا محەمەد پێنجوێنی، جێگری لێپرسراوی لقی سلێمانی یەكێتی مامۆستایانی كوردستان ده‌ڵێت : بونی سایتە سێكسییەكان بەشێوەیەكی ڕەها كە گەنجان پێوەی ئالودەبون، زیانێكی زۆری هەیە‌و دەبێتە هۆی هەڵوەشانەوەی شیرازەی خێزان‌و خوێندن، هەروەها تیرۆری ئەخلاق‌و گیرفانە، بۆیە پێویستە حكومەت هەنگاوێكی جدی بنێت بەمەبەستی دانانی فلتەرێك لەسەر ئەم سایتانە.

 

ئاماژەی بەوەشدا، ئێستا هەمو گەنجێك و تەنانەت منداڵێكیش ئینتەرنێتی لەبەردەستدایە و بەمۆبایل یان كۆمپیتەر یان ئایپادەكەی دەتوانێت بەئاسانترین شێواز هەر سایتێكی بوێت دەیكاتەوە، بۆیە ئەگەر ئەم سایتانە دابخرێن یان فلتەریان لەسەر دابنرێن، ئەوا بازاڕی كۆمپانیاكانی ئینتەرنێت لاواز دەبێت، نەك گەنج زیان بكات‌و بیر لەشێوازێكی دیكە بكاتەوە.

باسی لەوەشكرد، ئەو كەسانەی ئالودەبون بە گرتە سێكسییەكان توشی كۆمەڵێك لادانی ئەخلاقیبون كە لەكۆمەڵگای كوردی ناگونجێت، هەروەها لەزیندانەكانەوە دەبیستین كە بەهۆی چۆن لادانێكی سێكسییەوە خەڵك زیندانی كراوە.

 

ئەمە سەرلێشێوانە نەك ئازادی

 

ڕێزان شێخ دلێر، ئەندامی ئەنجومەنی نوێنەرانی عیراق، باسی لەوەكرد، پێویستە هەمو لایەك هەوڵبدەین فشارێك لەسەر حكومەت دروست بكەین بەمەبەستی داخستنی سایتە سێكسییەكان، وەك دیارە حكومەتی هەرێم وەڵامێكی پێویستی نەبووە.

 

باسی لەوەشكرد، هیچ خێزانێكی كوردی ئەمەی پێی قبول نییە، چونكە دەبینین ئافرەت لەسەر تەلەفۆنێك دەكوژرێت، كەواتە چۆن خێزانێك لادانی سێكسی و سەیركردنی سایتە سێكسییەكان قبوڵدەكات.

باسی لەوەكرد، ئەمە گەندەڵی سەرەكییە، چونكە گەنج مەشغوڵدەكرێت بەناوی ئازادییەوە، بەڵام بەڕاستی ئەمە ئازادی نییە، كە هەرزەكاریكی 12 ساڵان تاكو بەیانی لەژورەكەیدا سەیری گرتەی سێكسی بكات، ئەمە سەرلێشێوانە نەك ئازادی.

سەرنجی خۆت بنووسە
x

Check Also

له‌ ساڵى 2018 دا نزیكه‌ی 15 هه‌زار كچ له‌ كوردستان خه‌ته‌نه‌ كراون

ڕێژنە میدیا   به‌پێی یاسا خه‌ته‌نه‌كردنی كچان له‌ هه‌رێمی كوردستان قه‌ده‌غه‌یه‌، به‌ڵام وه‌ك راپۆرتێكی نه‌ته‌وه‌ ...